बुटीबोरी: आदिशक्तीच्या उपासनेचा पावन पर्व म्हणजेच नवरात्रोत्सव बुटीबोरी परिसरात अत्यंत उत्साहात आणि भक्तिमय वातावरणात साजरा केला जात आहे. येथील प्रसिद्ध ‘जय माँ बोरीवाली मंदिरात’ नवरात्रोत्सवानिमित्त विविध धार्मिक व सांस्कृतिक कार्यक्रमांची रेलचेल पाहायला मिळत आहे.
पहाटे महापूजा आणि शास्त्रोक्त घटस्थापनेनंतर मंदिर परिसर ‘माँ अंबे’च्या जयघोषाने दुमदुमून गेला आहे. मातेचे दर्शन घेण्यासाठी सकाळपासूनच भाविकांच्या लांबच लांब रांगा लागल्या आहेत. उत्सवानिमित्त मंदिर परिसरात नयनरम्य विद्युत रोषणाई आणि भव्य फुलांची सजावट करण्यात आली आहे.
सायंकाळी महाआरतीनंतर भजन-कीर्तन आणि दांडिया-गर्बाचे विशेष आयोजन केले जात असून, यात भाविक मोठ्या संख्येने सहभागी होत आहेत. दर्शनासाठी येणाऱ्या भाविकांची सोय व सुरक्षा लक्षात घेता मंदिर ट्रस्ट आणि स्थानिक प्रशासनातर्फे उत्तम नियोजन करण्यात आले आहे.
